يوميات عيد سعيد الحظ

بسم الله أبدأ حلقات (عيد سعيد الحظ )


تعريف بالقصه: بطل الحلقات "عيد" هو شخصيه من عالمنا المعاصر . شاب كغيره من الشباب العاطل. مر علي تخرجه 8 سنوات دون عمل أو وظيفه . و تحكي الحلقات و تسرد لنا أيام "عيد" و بحثه عن وظيفه سواء مناسبه أو غير مناسبه ( المهم إنه يشتغل و خلاص ) وما يمر به من مصاعب



القصه لا يوجد بها أي مبالغات و لكن هذا هو حال شبابنا المعاصر ( المعصور ) وما يمر به من مشكلات و تعنت من حكومته الفذه.


أتمني لكم الإستمتاع بها . و كما يعرف عن الشعب المصري إنه (إبن نكته) و يحول مآسيه و مشاكله إلي نكت و ضحك و هذه الحلقات من ذلك النوع.



كل حلقه مستقله بذاتها و مختلفه عن غيرها .. و في كل حلقه يحدث لـ "عيد" مواقف مختلفه. ولا يشترط أن تكون الحلقات كلها عن بحثه عن عمل و لكن هناك حلقات سيكون بها باحثاً عن الترفيه حتي ينسي ما يمر به من مصاعب.

أول حلقه هتنزل حـــالاً بعنوان : "عاطل منه فيه"
.,.الحلقه الأولي.,.


الشخصيات: الأب (سعيد) .و.، الأم (فوزيه) .و.، الإبن (عيد) .و.، هيثم (صاحب عيد)..، علاء(صاحب سيبر) .و.، المعلم حنتيره(صاحب مشتل) .و.، جملات (هتعرفوا مين من القصه) .و.، (زوجه المعلم حنتيره)


صحيت الصبح ع صوت دوشه .. أبويا و أمي بيتناقروا بسببي كالعاده عشان مش لاقي شغل و قاعد عواطلي)


الأب: هو البيه لسه نايم؟؟؟!

الأم: أيوه يخويا

الأب: طب قومي صحيه يعمل أي حاجه إن شاء الله حتي ينظف البيت.

الأم: ليه كدا يخويا دا غلبان ياعيني و جاي وش الفجر و تلاقيه جاي تعبان من كتر اللف و ملقاش شغل.

الأب: الدنيا مليانه شغل يا فوزيه هو اللي تلاقيه بيتبطر ع النعمه و أي شغلانه يقول لأ .. ولو إشتغل مبيكملش يوم واحد و بيعمل مصيبه


(خرجت من أوضتي عشان أوضع حد للنقاش دا)


أنا: صباح الخير ياحاج.. صباح الخير يا ماما

ماما: صباح الخير يا ضنايا

أبويا: خير؟؟ هييجي منين الخير يابن الكلب

أنا: الله الله الله .. ليه الغلط طيب يا بابا أنا عملتلك ايه دا أنا حتي لسه صاحي

أبويا: مهو اللي غايظني إنك مبتعملش حاجه. قصره لقيت شغل ولا لسه؟؟

أنا: لسه والله يا بابا بس واحد صحبي كلمني ع شغلتين و هروح أشوفهم النهرده إن شاء الله

أبويا: شغلتين مره واحده بسم الله ما شاء الله. و إيه هما يا تري؟؟

أنا: لسه معرفش .. أنا قايم ألبس عشان أروح أشوفهم



(إتصلت بصديق الدرب هيثم عشان هو اللي جايبلي الشغل ومش بيشتغل زيي)




أنا: هاي .. إزيك يا هيثم؟؟ إيه أخبار الحياه معاك

هيثم: كوووول و إشطه طحن يا مااااان

أنا: ها.. إيه الشغل اللي إنتا جايبهولي يا مان

هيثم: و الله شغلتين أطحن من بعض بس معجبونيش قلت يمكن يعجبوك

أنا: شوقتني يا مان . هااااا .. قووووول!!!

هيثم: أول شغلانه في مشتل و هتأكل الخرفان و البقر و سهله جداً و فلوسها حلوه بس معجبتنيش بسبب الريحه ياااااي إففففف. و تاني شغلانه في سيبر و بسيطه آخر حاجه يا مان . تعالي نروح الأول لصاحب السيبر نشوف


(دخلنا سيبر شيك و قابلنا صاحبه اللي إسمه علاء)


هيثم: عاي علوكه

علاء: هاي إتش واتس أب؟؟

هيثم: كوووول يا ماان. عيد أهو اللي كلمتك عنه

علاء: هاااي سعيد .. بص بقا يا مان الشغل هنا بسيط آخر حاجه (و قعد علاء يفهمني طبيعه الشغل )

أنا: طيب حضرتك دا بالنسبه للشغل .بالنسبه مواعيد الشغل و المرتب بالصلاه ع النبي كدا

علاء: هتشتغل 12 ساعه و هديلك 150 جنيه بس و الله دا عشان خاطر إتش حبيبي. إشطه يا إتش إموووواااه

هيثم: حبيب هارتي يا مان و افق بقا يا عيد دي شغلانه سهله فحت



( قعدت أفكر شويه طيب لو جيت أحسبها 1.5 رايح و 1.5 جاي كل يوم يبقي في الشهر مواصلات 90 جنيه طيب لو هتغدي و أفطر نقول مثلاً 2.5 جنيه فول و طعميه كل يوم يبقي 75 جنيه إذن 90+75= 165جنيه و أنا مرتبي 150 جنيه يعني أنا محتاج 15 جنيه زياده عشان أروح السيبر و أشتغل


أنا: ماشي يا أستاذ علاء هفكر و أرد عليك. سلام

هيثم: ها ايه رأيك يا مان؟؟؟

(رديت ع هيثم و فهمته و قاللي خلاص مفيش غير إننا نروح الشغله التانيه)


هيثم: هااااي يا معلم

المعلم حنتيره: إزيك ياض يا بن المفكوكه. إيه اللي جابك (يااااض) مش قلت مش هتشتغل و عملتلي فيها واد (كلاص) و بتاع بابي و مامي و قرفت من الريحه و خلعت

هيثم: مهو أنا جايبلك عيد حبيبي يشتغل. واد حرك و جامد إنما ايه يا معلم.

حنتيره: جامد؟؟!! مش عارف ليه ياض كل ما أشوفك أشك فيك و يوصلي أفكار مش مظبوطه. نهايته، سيبه و إتكل إنتا

أنا: أوكي يا مان إخلع إنتا

هيثم: أوكي يا دوووود هبقي أتصل بيك تحكيلي عملت إيه . بيس

حنتيره: بص ياض يا سعيد الشغله دي سهله أوي . كل اللي هتعمله تأكل المواشي في بوقها .. صعبه دي !!!

أنا: لا سهله أوي طبعاً .. أنا أعجبك أووي بس .. بس أ . أ.... متفقناش ع المرتب يعني

حنتيره: أنا كنت هدي الواد صحبك (الخرونك) دا 200 جنيه بس إنتا شكلك مفتح و حرك فهديك 300 جنيه. إبسط ياعم

أنا: طب مواعيد الشغل؟؟؟؟

حنتيره: تيجي الصبح و تمشي المغربيه كدا

أنا: ألف ألف شكر يا معلم


( لبست العفريته و قمت أأكل المواشي زي ما المعلم قاللي و وراني .. و خلصت كله ما عدا جموسه واحده و خلاص هرتاح . و أنا بأكلها البرسيم غصب عني البرسيم دخل في عينها و نامت في الأرض و أعدت تتمرمغ و قامت لقتني قدامها و عنيها بتطق شراااار و هااااتك يا جري ورايا عماله تجري ورايا بقرونها الطويله ومصره تنطحني.. طلعت جري ع المعلم حنتيره)



أنا (لاهثاً): يا معلم يا معلم يا معللللللم .. إلحقني ..!!!!!!

حنتيره: إيه في ايه ياااض سرعتني هببت ايه ؟؟؟ سميت البهايم؟؟؟

أنا: الطور هاج يا معلم و جاي ورايا

حنتيره: طووور؟؟؟ قصدك جملاااات؟؟ ينهار أبوك اسود عملت فيها ايه يااااض؟؟؟

أنا: هي كمان نتايه؟؟؟


(جملات جايه من بعيد و وراءها غيمه من الغبار من شده سرعتها و قرونها مدببه و متسلطه نحيتنا)



حنتيره: يا لهووووووي . إجري يااااض بسرعه نحيه الزريبه. إجري قبل ما تيجي.



(جرينا نحيه الزريبه . ومن خوفي سبقت المعلم حنتيره و قفلت ورايا و سبته بره.....)


(تــــــتــــبـــــــع)

اكيد ده اللى بيحصلكوا لما تورو على شغل شبه ده بالضبط ماعلينا شكلنا هنتجه للحكومه ومش نكمل القصه عموما انتو ورغبتكم