قرقضة ضوافر

مين فينا ساعة القلق مش بيقرقض ضوافره

اعتقد ان هذه العملية تضح جليا خصوصا في فترة الامتحانات....

لكن ان تكون هذه عادة ... هذا هو الخطير

المهم ..... بعد السلام والذي منه


لكن وبدون هتافات و لا ترحيبات ...تعالوا نتكلم

هو احنا في قسم ايه؟

اه ده بتاع الشباب ...

المهم ايه رايكم واحنا كده بنقرقض ضوافرنا نتكلم عن قلقنا..

ايه اللي احنا قلقنين منه وخايفين انه يحصل؟

و علي مدي السطور اللي جاية عايز اقرقض ضوافري وانتم كمان بس بشيئ مفيد....

مش عارف ابدا بايه .. بس عايز نخليها مثلا كلام من القلب للقلب للقلم للدماغ عدل..

قرقضة ضوافر علي جانب من النيل الاعظم في كنف الحضارة حول بحر من السعادة وشط من الاحزان خلف اسدلة ليل وردية ومطر يحبو خلف اشعة شمس ذهبية لتختفي وراء انجم لا تعلم ما هيتها سوي انها انجم .........

اول قرقضاتنا النهاردة هيه
مشكلة الامتحانات

وانا هاحكي عن تجربة خاصة في سنة تانيه
اكيد كل واحد فينا ليلة الامتحانات دي بيقرقض ضوافره من القلق ويمكن ضوافر اللي جنبه كمان

من اصعب الليالي اللي مرت عليا في موضوع قرقضة الامتحانات ده كانت ليلة امتحان ورقة الفسيولوجي الاول ويليها الثانية فالثالثة

المهم طول الليل والواحد بيذاكر وعليه انه يراجع بتاع 300 ورقة من المقطع الطويل في ليلة عشان يلحق يخلصهم لان نظام الامتحان اتغير وبقي اسئلة صغيرة وكمان فيه اختيار من متعدد وعيشة بقي

نسيت اقولكم ان مفيش مصدر معين تذاكر منه .. يعني الواحد كان مطالب بانه يقرا من اكتر من مصدر عشان يجمع المعلومة صح ...

طول السنة الموضوع ده مش مهم .. لانك بتحاول تجمع معلومات وتفهم ... لكن ليلة الامتحان دي بقي مشكلة .. هتذاكر منين وهتذاكر ايه وهتقرا ايه..

تصوروا انا غيرت كل مصادر المذاكرة بتاعتي قبل الامتحان باسبوعين عشان المصادر الاولانية اكتشفت انها فيها ناقص وبرضة فيها زيادات مالهاش لازمة ... وهيصة والشاب بيرقص عالتربيزة..

المهم ... ايه اللي حصل .. مع اول حقنة من الامتحان .. اقصد اول سؤال نزل عالواحد برود غريب .. اصلك اما تقرا اول سؤال وانت والحمد لله مش عارفه والتاني اول مرة نسمع عنه والتالت مشفتش الكلام الغريب ده قبل كده والرابع كان مش مهم في المذاكرة .. واسئلة غريبة ومش مفيدة ومالهاش لازمة غير في التعقيد للطلبة وبس .. ساعتها حسيت بقيمة الاغنية الوطنية .. يبقي انت اكيد اكيد في مصر..

المهم عدت اول ساعة والواحد وصل لنتيجة هايلة .. ان الورقة لسه بيضا وهو لسه بيقرقض في ضوافره من 15 سؤال عارف 5 بس منهم 2 مية مية وال3 هيعرف يكتب فيهم انما الباقي هيكتب فيه ايه .......

وعدت كمان نص ساعة وخلصنا ال5 اسئلة .. نعمل ايه بقي ...

بعد ما نقرقض .. نسطر الصفحات ونحاول بقي ونكتب اي حاجة نغزي بيها العين .....
طبعا في وسط الحكاية دي ... نظرات بينا وبين زمايلنا وضحكات بريئة وابتسامات تنم عن الاستغراب والدهشة والاعجاب بمستوي الاسئلة التي تعدت مستوي الدكتوراة...

والحمد لله مرت الثلاث ساعات علي خير دون حادث انتحار واحد ... سوي بعض التاوهات والسخرية و....... وحانت لحظة تسليم الورق

وسلمنا الورق وغادرنا مسرح الجريمة والواحد والحمد لله بيدور علي ضوافر تانية عشان يعرف يقرقض فيها في الامتحانات الجاية .....

خلصت القرقضة .. وهيه خفيفة المرة دي
ونكمل بعد كده باذن الله

واستنونا في قرقضة تانية .. لعل وعسي ....

القرقضة التانية:
المهم ... نرجع لموضوع الامتحانات والسهر وغيره وغيره ... اما غيره بتاع قرقضة النهاردة فهو امتحانات الشفوي واللي بيجري فيها ...

وطبعا دي لجنة ولاد الدكاترة ... انا هنا لا سمح الله مش باعيب في ولاد الدكاترة ومش باقول عليهم اغبياء ... لكن تبقي الكوسة عيني عينك ... عادي .... وانت مال ....(حذفت للرقابة)..

اما ياسادة يا كرام من ضمن المواقف وانت بتقرقض فيما بقي من ضوافرك وانت داخل امتحان الشفوي لانك عتبقي انت والدكتور وهواك .. اقصد بلا اي مساندة من اي احد .... وهنا يا باشا يكرم المرء او يهان (بجد) ... وتلاقي الدكتور بيرحب بابن الاستاذ العلاني او الاستاذة لفلانية .. اهلا يا حبيبي بابا عامل ايه وماما وتيته والمجتمع والناس ...

ايه دي يا بابا .. دي clavicular يا دكتور ... برافو يا حبيبي
انت يا ابني (الدكتور بيبصلي) ايه العضلات اللي ماسكة فيها والعصب اللي بيغذي كل واحدة ووظيفتها ايه وايه اسمها كان عند قدماء المصريين والهكسوس (هم الهكسوس كان ليهم في الطب؟) انت هتناقر معايا ...... برة

المهم ... تقرقض في ضوافرك وحلني علي ما يطلعلك غيرها

بصوا كفاية قرقضة دلوقتي ونقرقض بعدين .... استنونا

القرقضة التالتةالقرقضة التالتة

حبيبي اللي تاعبني معاه

تلاقي اي حد بيحب حد عايزه دايما غيران

طب ليه بس يا ابنااااااااااااات

يقولولك نار الغيرة زي الشطة بتشعوط اقلب والولد يا حول الله يقرقض في ضوافره

معلش اصل زميلي عايز مني محاضرة
وفلان عايز مني كشكول
وفلان كلمني النهاردة
وفلان بصلي
والواد يشعوط

يقوم هوه بقي يعاند
طب ماهي فلانة كلمتني وكانت عايزة تسافر معايا
مقلتلكيش انا عالرحلة واللي حصل فيها
يالهويييييييييييييييي

طب اقولكم بصراحة
فيها ايه لو بطلنا الكلام ده خصوصا لو فعلا فيه نية صادقة ان البنت والولد دول يكملوا مع بعض

ولا اقولكم

الغيرة زي الشطة بتشعلل الحب

واسالوا الست ماري منيب ... مدوباهم اتنين ..... الغيرة وسنينها

القرقضة الرابعة .... حزين جدا سعيد
حزين جدا سعيد


حد فكر فينا قبل كده ايه اللي ما بين الحزن والسعادة

اقصد اللحظة او المشاعر اللي بتفصل ما بين الاتنين......


القلق

مابين الحزن والسعادة دايما لحظة قلق

شوف حالك قبل ما تطلع النتيجة وكمية القلق اللي بتبقي فيها واول ما تطلع يا اما بتبقي مبسوط عشان حققت اللي عايزه يا اما حزين عشان قليت عن اللي عايزه

القلق قبل الامتحان ويا اما يطلع متوقع ويبسطك ويا اما يطلع غير خاااااالص وتبقي حزين

عرفتم قصدي ايه

فيه موقف اتعرضت فيه في الاستقبال بتاع المستشفي امبارح وهو ان خال واحده صاحبتي ومش بس صاحبتي لا ده اخوتي كمان جايلنا في حادثة عربية وللاسف مش عارفين نعمله حاجة ... الاصابة جامدة وكلنا متوقعين النتيجة لكننا بنتعلق في احبال دايبة علي امل انه ممكن يفوق ويرجع ونعمله اي عملية نرجعه بيها .. بس قدر ربنا كان سبقنا ومات واحنا في الاستقبال ... وطبعا قبل كده لحظات من القلق الرهيب كانت باينة في عينينا كلنا حتي النواب بتوع المستشفي اللي اتفضلوا مشكورين وعملوا اللي عليهم وزيادة وبعد لحظات القلق دي طبعا كان فيه كم كبير جدا من الحزن..... ربنا يتغمده برحمته ويرحم جميع موتي المسلمين


معلش القرقضة المرة دي جد وكئيبة شوية

لكن حبيت بس اقول ان دايما مابين الحزن والسعادة لحظات قلق ياريت نستغلها بالدعاء ان ربنا يفرج عننا كلنا يارب

وشكرا انكم استحملتوني وانتظروني في قرقضة جديدة

القرقضة الخامسة ... بشاير خير والله



عمركم في يوم كده اول ما صحيتوا الصبح تحسوا كده بان اليوم ده فيه بشاير خير
يعني اوقات الواحد اول ما يصحي الصبح يقول اليوم والحمد لله باين من اوله

او مثلا اول ما تواجهه مشكلة .. يارب انا اصطبحت بوش مين النهاردة

تعرفوا .. انا من النوع اللي اوقات يعني بتصادف ان اليوم لما بيبقي مقفل من اوله .. وغلاوتكم عندي مش عارف ايه اللي بيحصل .. طب تشتي حتي تغير الجو ده ... ابدا
تلاقي اليوم مقفل .. من المواصلات للكلية للصباح والاذاعة والكهربا والمية وهيصة

المهم تنزل تروح الكلية متلاقيش مواصلات او لو لقيت البنطلون يشبك في الكرسي ويتقطع او بعد ما تنزل خالص والحمد لله عدت علي خير ووصلنا عربية تكون معدية تكرمك بدش صباحي ... اصلك نسيت تغسل وشك فالراجل مشكور قرر انه يغسله بس بطريقته
او ممكن تعدي الشارع وتدخل الكلية وبعد ما تدخل .. هو انت متعرفش مش النهاردة اجازة .. لا والله!!!

المهم تاخد بعضك وترجع البيت ونفرض انك وصلت سالما والحمد لله .. تبوس ايدك وش وضهر وتدخل تغير هدومك ... الكهربا قاطعة .. الغاز فاضي ..يعني مفيش غدا .. المية قاطعة .. حتي الدش يا اخوانا

تيجي تنام ... فرح في الشقة اللي تحتيكم

المهم ان اليوم ده اول ما ينتهي بتقف تصلي وتدعي

الحمد لله الذي انجانا منك علي خير

اقولكم علي حكاية كانت بتحصلي ... كنت ايام امتحانات الميد تيرم لما اشوف واحد ه صاحبتي الصبح لازم الامتحان يكون صعب ومعرفش احل فيه برغم ان الواحد يبقي مزاكر وطالع عينه

المهم قررت اكسر النحس في سنة تانيه وقررت اني اقعد معاها في السكن ... شيلت مادتين

قلتلها والله ما عادت تعود وما اشوفش وشك تاني يا
نوهااااااااااااااااااااااااائيييييييييييييييي

ومن يوميها والحمد لله مشفتوش غيربتاع مرتين والواحد بيجيب تقدير

مش عارف بقي دي صدفة ولا بجد فقر ولا ايه

المهم....... انك تكون مبتسم وعارف ان اليوم ده لابد وحتما يكون كده وتسلم امرك لله

محدش فيكم مثلا صادفه يوم كده وقال فيه انا اصطبحت بوش مين النهاردة؟

واشوفكم في قرقضة جديدة باذن الله

حد عنده قراقيض تانيه يقولها او حد وصل لكوعه يقولنا وصل لكوعه ازاي

انا عمري ما قلقت من الامتحانات واسألوا أبو أيمن

ولا ايه ياحموده

انا بقى مش بقرقض خالص والله
ولا بقلل من اى امتحان ابداااااااااااااااااااااا
ونجحت وخلصت والحمد لله كله بيعدى الضوافر ذنبها ايه يعنى بقى

الموضوع كبير جداااااااا