دعوة عامه للتطنييييييييييييييييييش

كلنا بنحب نطنش مش في كل حاجة طبعا في حاجات وحاجات ودي صفة فينا طب إيه المشكلة ؟
إيه رأيكم لو لعبنا في قاعدة التطنيش دي وحولناها لقاعدة ايجابية؟
يعنى إيه الكلام ده أنا عارفة إن محدش فاهم حاجة بس ثواااااااانى استنو بس متطنشونيش وأنا هشرح لكم .

أوقات كتيرة بنطنش حاجات حلوة ونكسل نعملها زى إننا مثلا :

بنطنش النصيحة لما حد يخاف علينا ويقولها لنا ونرفضها بغرض انه مش فاهم وأنا عارف مصلحتي.

بنطنش إننا نسمع رأى اى حد مخالف لينا لان في اعتقادنا إننا الصح ديما ومفيش زيينا .

بنطنش إننا نحافظ على شوارعنا وبنكتفى إننا نقول البلد دي عمرها ماهتنضف وأنت أصلا مش بتساعد وبتطنش وترمى في الشارع .

بنطنش زيارة أقاربنا بحجة انه مفيش وقت (على أساس انك مهم ) أو انك ملكش كلام معاهم قوى(وش كسوف يعنى) أو إن البيت بعيد (ولو واحد صاحبك خدك مشوار لأخر البلد عادى)أو .............

بنطنش إننا لو قاعدنا في مكان واحد بيشرب سجاير فيه إننا نفضل قاعدين ساكتين ونكتفي بعبارة التدخين ضار بالصحة قوم وسيب له المكان حسسه انه بيعمل حاجة غريبة قوله دخن بعيد عنى
بنطنش وبنطنش وبنطنش ............... .......

طب ليه ماتنطنش عوامل الإحباط إلى حواليك (أشمعنا دي) وتقعد

تشتكى وتقول وتعيد وتزيد

ليه ماتنطنش ظلمك في اى حاجة عموما في الحياة وتحولها لدافع لنجاحك

ليه ماتنطنش اى حد يقلل من قيمتك وتهتم اكتر انك تنمى شخصيتك وتستفيد من إمكانياتك وتكتشف قدراتك وأكيد هتلاقى الى يقدرك لأنه بيفهم

ليه ماتنطنش الغلا الى حاصل في البلد وكل ما تعلى من كفاءاتك كل ما هتشتغل في مكان أعلى ومرتبك يعلى وبعدين مانت ممكن تعمل مشروع صغير جمب وظيفتك بدل ماتندب حظك (انويها بس)ليه ماتنطنش البطالة الى حواليك وبدل ماتقول هو في شغل قول ازاى اخترع شغل (مقصدش لقدر الله انك تستورده م المريخ ولا حاجة) اقصد إننا نشغل دماغنا ونبتكر مشروعات صغيرة ويوم بيوم الصغير بيكبر و الى خلاك كبرت يخلى شغلك يكبر بس أنت أتقنه وأخلصه لربنا

ليه ماتنطنش الحاجات الى بتتفرض عليك ومش بأيدك تغيرها وتفكر في الحاجات الواجبة عليك

يعنى باختصار تعالو نتمرد على التطنيش وبدل مانطنش اى حاجة حلوة نطنش اى حاجة هضايقنا وتمنعنا من الحركة ونبرمج دماغنا انه لو قابلتنا اى مشكلة نشوف بسرعة سببها إيه ونبدأ في التفكير لحلولها ولو ملهاش سبب أفكر على طول هحلها ازاى بدل ما نقعد سنين وسنين نتكلم عنها ونقول إحنا بنعانى من وبنعانى من والأسباب كذا وكذا ونقعد نعمل أبحاث في المشاكل وأسبابها خلاااااااااص زهقنا كفاية بقى يلا نفكر في الحل لاى مشكلة صغيرة اوكبيرة ونطبقه

طنش تعيش تنتعش تعيش حياه افضل
وفى مثل بيقول
طنش تفحل

محمود الكاشف كتب:: طنش تعيش تنتعش تعيش حياه افضل
وفى مثل بيقول
طنش تفحل

مشكور محمود باشا
بس مش كل شيئ المفرود نطنش فيه

والله ياابو حنين فيه أشياء كتيرفينا عوزه تغير مش موضوع االطتنش بس

اديها طناش وعيش ببلاش

موضوع هااااااادف جدا ومغزاه حلو

بس مين هيسمع ومين هيجيله طاقه انه يهتم بكل حاجه

ساعات التطنيش بيبقى راحه عشان يخرج الانسان من موده

هو طبعا غلط بس لو اهتمينا بكل حاجه هنتعب ونموت

بجد جميل جدا من حضرتك التطرق لمثل هذا الموضوع

مشكــــــــــــــــــــــــورين مروررركم شرف لمواضعي

» معلومات عامه (الجزءالرابع)
» معومات عامه ( الجزء الخامس)
» معومات عامه ( الجزء الاول )
» معلومات عامه ( الجزء الثانى )
» معلومات عامه ( الجزء الثالث)