لسه فاكره

لساكي فاكرة تدوري وسط الزحام

عن طفل عمره ألف عام

عن شيخ وقلبه يا دوب غلام

درويش وهام

لكنه ف عنيكي أوهام

زرع ف ضلايتك مقام

ونام وقام

يسكر حنين

كانت عليه تمشي السنين

فيئن من تقل القدم

ويشب يلقي ف العدم ألفين عدم

يلقي الفؤاد اللي اتعدم

ماسك ف شباك المقام

وبيقرا سورة م الندم

فيه ألف بير ف محبتك كان اتردم

لكن بير دمعه عليكي متردمش

الحسن رمش

وانتي اللي كنتي بتلحظيه مبيتحرمش

رنة غناكي ف الغيطان مواويل أمان

كان قبلك انتي مفيش زمان

انتي البداية

والحكايا لم يظهر فيهم اسمك

يبقوا يادوبك حكايا

مرة ماشية تهزي شالك

مرة مزهية بجمالك

مرة خلخالك وخالك

يفتنونتي

أحكي عنك ألف قصة

عن عروسة تبص بصة

ينتشوا الجدعان ف رقصة

يبقوا دراويشك يهيموا

ف العيون المستحية

يسألوني

هل ف شرع العشق لو مات الحبيب

تدفع المحبوبة دية ؟

كل موتة وليها دية

إلا ديّة

ضد مجهول القضية

مين يلوم النور على موت الفراش ؟!

سهم قلبه لما طاش

مرتضاش إلا أنه يكون ضحية

واتفرد دمه على أرض المقام

طيّر حمام

زغاليل وطارت في الهوى

شيلاكي ترنيمة شجن

وتميمة تحمي م الزمن

ونشيد وعيد وأيام محن

وساعات سحن مبتتقبلش

أو قوت وقرش

أيام كتير مبنلتقهش

لكن الأكيد إنك كمان

ضلة وادان

ومواسم الحب الجميل

اللي بيطرح في الأوان

ويمر آن من بعد آن

وأنتي على أرض الميدان

متحزّمة ومعزّمة

طالقة زغاريد الفرح وانتي

هناك متألمة

وأنا زي طفل غريب بيحبي ع المَدى

مغروسة في قليبه المِدى

وممددة

معرب على إنه مضاف

من بعد ما كان مبتدا

واللي ابتدا بالعشق يصبر

ع الجفا

جايز ف يوم ف محبتك يلقي

الوفا

جايز ف يوم يلقي الدفا